ABŞ-ın Monterey şəhəri Azərbaycan bayraqları ilə bəzədilib

Baxış sayı: 79

ABŞ-ın Kaliforniya ştatının Monterey şəhərində Azərbaycanın Dövlət Bayrağı Günü ilə əlaqədar geniş tədbir keçirilib.

Azərbaycanın Los-Ancelesdəki Baş Konsulluğunun Monterey Şəhər Şurası ilə birlikdə şəhər meriyasının qarşısında keçirdiyi tədbirdə şəhər rəhbərliyi, iş adamları, KİV təmsilçiləri, mədəniyyət xadimləri, eləcə də ABŞ Müdafiə Nazirliyinin Montereydə yerləşən nüfuzlu ali təhsil ocaqlarının professor və tələbə heyəti iştirak ediblər. Tədbiri giriş nitqilə açan Monterey şəhərinin meri Klayd Roberson (Clyde Roberson) qonaqları salamlayaraq, Montereyin bu cür mötəbər tədbirə ev sahibliyi etməsindən məmnunluq duyduğunu bildirib. O, ABŞ ilə Azərbaycanın həm ikitərəfli, həm də beynəlxalq təşkilatlar çərçivəsində uğurlu əməkdaşlığına toxunaraq, Azərbaycanın ölkəsi üçün regionda önəmli müttəfiq olduğunu vurğulayıb. Monterey ilə Lənkəran arasında “qardaşlaşmış şəhərlər” münasibətləri barədə danışan mer, qarşıdakı illərdə bu münasibətlərin daha da sıxlaşacağına ümid etdiyini diqqətə çatdırıb.

Xatırladaq ki, Monterey şəhəri 2011-ci ildə Azərbaycanın Lənkəran şəhəri ilə qardaşlaşıb.

Azərbaycanın Los Ancelesdəki baş konsulu Nəsimi Ağayev ölkəmizin müstəqillik tarixi haqqında ətraflı danışaraq, üçrəngli bayrağımızın 1918-ci ildə Azərbaycan Xalq Cümhuriyyəti hökumətinin qərarı ilə qəbul edildiyini, 1990-cı ildə Sovet İttifaqının süqutu ərəfəsində ilk dəfə Ümummilli Lider Heydər Əliyevin rəhbərliyi altında Naxçıvan Ali Sovetinin sessiyasında muxtar respublikanın bayrağı kimi təsdiq edildiyini, 1991-ci ildə isə müstəqil Azərbaycan Respublikasının dövlət bayrağı kimi öz təsdiqini tapdığını qeyd edib. Baş konsul müstəqil və müasir Azərbaycanın bütün sahələrdə inkişaf edərək, bu gün regionda ve beynəlxalq arenada böyük nüfuz sahibinə çevrildiyini vurğulayıb.

Sonra çıxış edən Monterey Şəhər Şurasının sabiq üzvü, Lənkəran-Monterey münasibətlərinin qurulmasında önəmli rol oynamış Nensi Selfric,Lənkəran-Monterey əlaqələrinin tarixindən söz açaraq, Montereyin Azərbaycanla münasibətlərinin daha da möhkəmlənməsi sahəsində bundan sonra da səy göstərəcəyini bildirib.

Daha sonra Monterey merinin imzaladığı, Azərbaycan Dövlət Bayrağı Günü və Monterey-Lənkəran münasibətləri haqqında bəyannamə mer K.Roberson tərəfindən baş konsul N.Ağayevə təqdim olunub. Yerli Azərbaycan icmasının üzvü Eldar Xudiyevin skripkada ifa etdiyi “Sarı gəlin” və “Bayatılar” mahnıları tədbir iştirakçıları tərəfindən sürəkli alqışlarla qarşılanıb.

Qeyd edək ki, Azerbaycanın Dövlət Bayrağı Gününün şərəfinə Monterey şəhərinin mərkəzində yerləşən Alvarado küçəsi çoxlu sayda Azərbaycan bayraqları ilə bəzədilib.

NÜBAR NİYAZİQIZI//ATV.az